Латын әрпі- болашақтың бағдары

Елбасы Нұрсұлтан Әбішұлы Назарбаевтың 2017 жылдың 12 сәуірінде халыққа жолдаған «Болашаққа бағдар: рухани жаңғыру» мақаласында: «Біріншіден, қазақ тілін біртіндеп латын әліпбиіне көшіру жұмыстарын бастауымыз керек. Біз бұл мәселеге неғұрлым дәйектілік қажеттігін терең түсініп, байыппен қарап келеміз және оған кірісуге Тәуелсіздік алғаннан бері мұқият дайындалдық» – деп ерекше тоқталып, бұл өзекті мәселені жеделдетіп іске асыру жайын атап өткен болатын. Келешегі кемел, болашағы сәтті қадамға жол тартқан ауқымды құжатта елдік пен ұлттық идеологияның, рухани жаңғырудың өзекті де маңызды тұстары қарастырылған. Латын тілі – жалғыз Қазақстанның ішінде жобаланған саясат емес, бұл бүкіл дүние тілдерінің тұғыры. Қазіргі ағылшын, француз, неміс, италиян секілді өркениетті елдердің тілдері терең бастауын сол латын тілінен алатындығын ескеруіміз қажет. Сол үшін әліпби жасауда таза латын тілінің өз заңдылықтарын негізге алғанымыз жөн.

Жазу – әрбір елдің, халықтың рухани мүддесі, әлеуметті мәні қарыштап қанат жаятын құбылысы. А.Байтұрсыновтың: «Ел – бүгіншіл, менікі – ертең үшін» деген ғажап болжамын негізге ала отырып, Елбасының сындарлы саясатына қолдау көрсетіп, бір ауыздан мақұлдап, ел үшін ортақтасқан аса маңызды қызметке атсалысқанымыз абзал.